ആഗോള സാമ്പത്തിക പ്രതിസന്ധികൾക്കും ഭൗമരാഷ്ട്രീയ അനിശ്ചിതത്വങ്ങൾക്കുമിടയിൽ ലോകമെമ്പാടുമുള്ള കേന്ദ്ര ബാങ്കുകൾ സ്വർണ ശേഖരം വൻതോതിൽ വർദ്ധിപ്പിക്കുന്നത് തുടരുന്നു. വേൾഡ് ഗോൾഡ് കൗൺസിൽ പുറത്തുവിട്ട ഏറ്റവും പുതിയ കണക്കുകൾ പ്രകാരം, കഴിഞ്ഞ ഓഗസ്റ്റ് മാസത്തിൽ മാത്രം വിവിധ രാജ്യങ്ങളിലെ കേന്ദ്ര ബാങ്കുകൾ ആകെ 39 ടൺ സ്വർണമാണ് വാങ്ങിക്കൂട്ടിയത്. ഈ സ്വർണവേട്ടയിൽ 20 ടൺ ശേഖരിച്ചുകൊണ്ട് ചൈനയാണ് ആഗോളതലത്തിൽ വീണ്ടും മുൻപന്തിയിൽ എത്തിയിരിക്കുന്നത്. ഇതോടെ ഈ വർഷം ഇതുവരെ കേന്ദ്ര ബാങ്കുകൾ സമാഹരിച്ച ആകെ സ്വർണത്തിന്റെ അളവ് 170 ടണ്ണായി ഉയർന്നു.
തുടർച്ചയായ 22-ാം മാസമാണ് ചൈനീസ് കേന്ദ്ര ബാങ്കായ പീപ്പിൾസ് ബാങ്ക് ഓഫ് ചൈന സ്വർണ ശേഖരം ഉയർത്തുന്നത്. ഈ വർഷം മാത്രം 80 ടൺ സ്വർണ്ണം വാങ്ങിയ ചൈനയുടെ പക്കൽ ഇപ്പോൾ ആകെ 2,387 ടൺ സ്വർണ്ണ ശേഖരമുണ്ട്, ഇത് അവരുടെ ആകെ കരുതൽ ധനത്തിന്റെ 9 ശതമാനത്തോളമാണ്. ചൈനയ്ക്ക് പുറമെ ഉസ്ബെക്കിസ്ഥാൻ (8 ടൺ), പോളണ്ട് (8 ടൺ), കസാക്കിസ്ഥാൻ (7 ടൺ) എന്നിവരും ഓഗസ്റ്റിൽ വൻതോതിൽ സ്വർണം വാങ്ങി. ഈ വർഷത്തെ ആകെ കണക്കെടുത്താൽ 98 ടൺ വാങ്ങിയ പോളണ്ടാണ് സ്വർണ ശേഖരണത്തിൽ ഏറ്റവും മുന്നിലുള്ളത്. കഴിഞ്ഞ കുറച്ചു മാസങ്ങളായി സ്വർണം വിറ്റഴിച്ചിരുന്ന തുർക്കിയും ഓഗസ്റ്റിൽ 3 ടൺ വാങ്ങി തിരിച്ചുവരവ് നടത്തിയിട്ടുണ്ട്.
മറുഭാഗത്ത്, യുക്രൈൻ യുദ്ധത്തിന്റെ പശ്ചാത്തലത്തിൽ പാശ്ചാത്യ രാജ്യങ്ങളുടെ സാമ്പത്തിക ഉപരോധം നേരിടുന്ന റഷ്യ സ്വർണ്ണം വൻതോതിൽ വിറ്റഴിക്കുന്നതായാണ് റിപ്പോർട്ട്. തങ്ങളുടെ വർദ്ധിച്ചുവരുന്ന പ്രതിരോധ ചെലവുകൾ നേരിടുന്നതിനും ബജറ്റ് കമ്മി നികത്തുന്നതിനുമായി ഓഗസ്റ്റിൽ മാത്രം 6 ടൺ സ്വർണമാണ് റഷ്യൻ കേന്ദ്ര ബാങ്ക് വിറ്റത്. ഈ വർഷം റഷ്യ വിറ്റഴിച്ച ആകെ സ്വർണ്ണം 56 ടണ്ണായി ഉയർന്നതോടെ അവരുടെ പക്കലുള്ള സ്വർണ ശേഖരം 2,271 ടണ്ണായി കുറഞ്ഞു. പാശ്ചാത്യ രാജ്യങ്ങൾ റഷ്യയുടെ വിദേശ ആസ്തികൾ മരവിപ്പിച്ചതിനെ തുടർന്ന്, മോസ്കോയ്ക്ക് തങ്ങളുടെ ഭൗതിക സ്വർണ്ണവും ചൈനീസ് യുവാനും ലിക്വിഡേറ്റ് ചെയ്യേണ്ടി വരുന്ന സാഹചര്യമാണ് നിലവിലുള്ളത്.
കേന്ദ്ര ബാങ്കുകളുടെ ഈ ശക്തമായ സ്വർണ ശേഖരണമാണ് 2024 മുതൽ അന്താരാഷ്ട്ര വിപണിയിൽ സ്വർണ്ണവില കുതിച്ചുയരാൻ പ്രധാന കാരണമായത്. ജനുവരി 29-ന് സ്വർണ്ണവില ചരിത്രത്തിലെ ഏറ്റവും ഉയർന്ന നിരക്കായ ഔൺസിന് 5,608 ഡോളർ എന്ന നിലവാരത്തിൽ എത്തിയിരുന്നു. എന്നാൽ, സമീപകാലത്തുണ്ടായ ഇറാൻ യുദ്ധഭീതി, പണപ്പെരുപ്പ ആശങ്കകൾ, യുഎസ് ഫെഡറൽ റിസർവ് പലിശനിരക്ക് വർദ്ധിപ്പിച്ചേക്കുമെന്ന സൂചനകൾ എന്നിവയെത്തുടർന്ന് വിപണിയിൽ തിരുത്തലുകൾ ഉണ്ടായിട്ടുണ്ട്.
Content Highlights:Global central banks continued to increase their gold reserves amid economic and geopolitical uncertainty.Central banks collectively recorded 39 tonnes of net gold buying in August, according to the World Gold Council.China led August purchases with 20 tonnes, extending its buying streak to 22 consecutive months.